9 waguren kan, d aya! Sghur Hemmar Bussaed.



M : Yal ccedda tdefritt talwit, id nnan imezwura, xas akka jerben ddunit, nekki ur uminegh ara.

B : Asefru-agi qessih atas, bezzaf yehzen, ur zrigh ara belli kecc d amedyaz.

M: D lmehna i yessefrayen macci d nekkini.

B: Inni-d kan ma d Malha i yessefrayen wama lmehna ur teseara aqemuc. Errnu-d cwit usefru di laenaya-k.

M: Ur telli d tamusni negh ttikci Rebbi, tettfit lmehna d ilemzi, teccur ul-is d cwami, yughal d amedyaz ur yebghi, lmehna txeddem awezghi.

B: Ad ak yaefu Rebbi maca ghef lmehna kan i tessefrayed. Ur tezmired ara ad-t ssefrud ghef ifertetta i yettcebbihen tafsut, ghef iwerjejiyen ig cennun deg unebdu, ghef udfel ig ttcebbihen idurar, ghef idebbalen ig ssehmayen uraren, ghef tehdayin ig ttcebbihen tayri, ghef ijejigen ig ttcebbihen tudert…Kecc lmehna, ccedda, lmerta, uguren…Ad rrewlegh, ma yella akka ur ttkemmilegh ara tacequft-agi mulac ad helkegh send ad att awed gher tagara. Achal di tudert-ik a Mhend?

M: Seigh 40 iseggasen, 10 wussan d 20 dqayeq.

B: Ahrah! Tettbinned-d amzun tmanyin. Allen-ik nexrent gher daxel, lqed-ik yekna, udem-ik yeccur ttiregwa amzun yexdem tafelaht. D acu ik yughen? Tughal-d d alaxxert yeddren, ala ighsan id yeqqimen.

M: D acu i-yi- yughen? Ur gganegh ara deg yigheblan.

B: Imdanen akk sean uguren maca gganen u yerna ur d sseghlin ara fell asen tawaghit yecban tagi.

M: Imdanen sean tigheblatin. Igheblan-iw sean aciwen ghelben widak n wezger. Lukan ad akk cekkden am nekkini, ad-t hesbed itran deg yid u yerna ad-t ccerged iselsa-k.

B: Amek i ggan akka uguren yesean afriwen?

M: Di tazwara, lligh gerzegh deg ueebbud n yemma. Ccigh, sswigh, ur hulfagh i usemmid negh i tafukt. Ttkessilegh akken iwata, tturargh, ferheh, rrwigh lehnana. Yiwen wass, sligh i ssut n tlawin. Bdan-t jebden-t deg yiqejjiren-iw s kra seant n tezmert. Nekk ttrugh, ttsughugh: A yemma! A yemma! Anida akka ara yi yawint tlawin-agi n daewessu. Ass-nni, i bdan igheblan-iw. Sersegh idaren-iw war lebghi gher tezgi am uhitiw-nni id deggren-t lemwaji.

B: Cwi kan ihi imi tedred 9 waguren izidanen wama ayen id yeqqimen tsebghet akk s uberkan. Kemmel-ihi!

M: Kregh-d deg ughebbar sdat wuxxam, ur hulfagh i lehnana n yemma negh n baba. Asmi wwdegh 3 iseggasen, wwin-i-yi gher yiwen ugezzar, netta igezzem, nutni slewliwen, ttghennin, nekk ttrugh, ttsughugh ahrahu! Walagh eazrayen.

B: Kecc meqqar tekkes-d tugdi n eazrayen u yerna thusbed di ddunit, ur k tthasaben ara ass mi ara temmetted. Fuken igheblan negh mazal?

M: Asmi wwdegh 5 iseggasen, fkan-i-yi-d aqrab d kra n ittafttaren, nnan-d : “ ruh srid  s agherbaz.” Ttghimagh di tdabut taneggarut, ur uffigh ara iman-iw. Aselmad yezga yettak-i-yi-d tinadin: “Qqim! Bbed! Aru! Ssusem! Effegh…”

Ttezzigh, rrennugh deg yiwen wuswir. Tagara, nnan-d iselmaden-iw: “Ruh ad tekksed tizit ay allagh tugi tmusni.”

B: Aqerruy-inek yeqqur am udghagh. Amer d nekk i d asemad-ik, ad sxedmegh tafdist d umenqar akken ad kecmen isekkilen deg allagh-ik. D acu it xedmed deg ass-nni?

M: Bdigh amahil d amectuh: Neghcegh isekla, eebbagh idghaghen, gezmegh isgharen, ssferghegh tibhirin, fersegh igran, kksigh izamaren, zenzegh iselman, luwagh imaswaten…Ulac ayen ur xdimegh ara i wakken ad sasigh aghrum-iw.

B: Safi akken qqaren irumyen: “36 imahilen, 36 imiziriat.”

M: Asmi wwdegh 20, yenna-d baba, ilaq ad -t xedmed axxam.

B: Ula d zwag dighen, tebghid ad inni-d yettikki deg yigheblan!

M: Qqim-kan! Anda ddigh ay id mmuden 3 isteqsiyen:

-“Teghrid?”

“Ala!”

-“Txeddmed?”

“Tikwal.”

-“Tettaghed-atas?”

“ Ala! Cwit kan!”

-“ Ut teghrid, ur tettaghed atas. Tenwid yelli ad -t iddir s tayri d waman isemmaden. Ruh anda ara tkelxed!”

B: Waqila ttidet, uguren-agi inek sean aciwen. Amek itt tefrid-ihi?

M: Asmi rwigh tidak yuran, uffigh-d yiwet n teqcict ur tezyin, ur teghri. As tinni-d si gahemama id teffegh. Ur ttessinegh, ur yi tessin, ur tthemmlegh, ur yi themmel.

B: Tayri macci d aghbel. Tettased mbeed zwaj.

M: Ihi nekk, ur seigh ara zzher acku d uguren imaynuten id yusan. Kerhegh ad kecmegh s axxam, yughal-i-yi d waghzen.

B: Zzher di ccina. Uguren tujewetten-id s ufus-ik. Aqq mi ara teghred, treggled deg ugherbaz, tughaled d ilef ghef iselmaden. U yerna ma tebghid akk themmel, yeshel. Ticki id tewwed tmeghra n tayri (Saint-Valentin) negh amulli-ines, ilaq ad-t teccuccuti-d kra: tamuqint n ijegigen, cwit n cikula, tarzeft…

Achal igerdan i teseid?

M: Seigh mraw(10).

B: Ahrah! Ixus kan yiwen akken ad xedmed tarbaet n dabex udar. Ilaq akk yewwet walbead s umerwaz alama twaladt itran gar wallen-ik.

Acimi i tkerhed axxam?

M: Ticki kecmegh s axxam, yal yiwen d acu i yebgha. Ula d yiwen ur yettqelib d acu i bghigh nekkini. Yal yiwen anda yettsughu.

-Awi-d ayefki! Awi-d zit! Awi-d lehlawat! Awi-d ssmid! Awi-d atriku…!

B: D acu tebghid keccini?

M: Bghigh lehna, tayri.

B: Ur txemmed ara att iniged gher tmura tijentad?

M: Yal tawaghit jerbegh-tt. Yiwen wass, nerkeb taflukt di Annaba, teccur am sardine. Nebgha ad n innig srid gher Telyan. Akken kan nebda abrid, yenhewwel lebher, yessussef-aghed akken ma nella.

B: Teseid takerrust?

M: Ha! Ha! Takerrust! Waqila tettkelixed fell-i. Lukan meqqar seigh taberwit, ad awigh deg-s igheblan-iw, ad att ufsus taekemt-iw.

B: Kecc d amdakel-iw, tghaded-i-yi. Ma thessed-i-yi-d, ad akk dawigh xas ur lligh d amejjay.

M: D acu yettqellib uderghal? Ghef tafat macci ghef tmengucin.

B: Ihi attan dwa, ad att arugh deg iccer-agi n lkaghed. Terxes u yerna ur txeddem ara uguren. Acu, ur ilaq ara att zegded ugar n wayen ilaqen mulac ad -t mmetted di tadsa.

-Ssbeh, ad -t sled i Muhemmed Felag.

-Ghef 12:30, ad-t sled i Sliman Cabbi.

-Tameddit, ad-t sled i Muhend u Yehya.

Deg yid, ad-t sled i Dda.Ahmed Hemmu akked d Dda.Mhenni At Waemaruc.

Mhend: Tanemmirt s tusda a Bussaed.

 

Tacequft sghur Hemmar Bussaed.

Laisser un commentaire