Anna d Haldvan: Aygher a tayri…? Sghur Hemmar Bussaed.



Par Lagerkvist d amaru ameqran n tmurt n Suede (1891-1967). Yekcem gher tkadimit n tmurt-is deg useggas n 1950 am akken yewwi arraz n Nobel di tsekla deg useggas n 1951. Yura atas n yidlisen gar asen tullist “âmes masquées”, id yettmeslayen ghef tayri i yezdin Anna d Haldvan. Attan s tewzel.

Tullist-agi tettawi imeghriyen gher tmurt anda tella tayri n tidet. Dinn-a, yal taghawsa tecbeh, tgerrez macci am da. Tudert nsen tezger akkin I tilawt.

Dinn-a, anda yebghu yedda wumdan, anda yebghu yemmuqel, cbaha ad-tsewhem, ur yezmir ad yekkes izri-s.

Anna d Haldvan ttwanecden-d gher tmeghra. Qqimen akken di tdabut, tetten imensi. Ghef yidis nsen llan wigad yettghenin, icetthen. Nutni ur telhin ara d ccdeh d uzawan. Telhan-d kan d yiman nsen. Xas akka ur myusanen ara, i tikelt tamezwarut i mwalan,hulfan amzun myusanen si zik. Yal yiwen deg sen yehulfa amzun d dkir it ijebden gher wayed. Hulfan i wafrayen d ijehdanen ttdeggiren-ten wa gher wa. D afrayen ur zmiren- ara ad sfehmen. Wareg jerben afrayen yecban wigi di tudert nsen deg asmi id lullen.

Qqimen akken. Tikwal heddren, tikwal susmen. Haldvan yettmuqul udem n Anna ineflen d sser d ccbaha am akken wareg iwala taqcict icebhen di tudert-is. Allen-is tiberkanin sduklen-t lehnana akked lehya. Axezzur-ines yettsehiren, yettbin-d fell-as ukukru d tusaft. Tedra yid-s am wefrux –nni n tezgi, ticki id yeghli yiffer n useklu ad yefriwes, ihega iman-is i wafug. Ijeriden n wudem-is nejren akken iwata. Taksumt-is tahmayant tettmil gher wuragh. Acekuh-is aberkan tmecdit gher deffir ayen i yefkan azal i cbaha n twenza-s. Taqemuct-is d tazeggaght, d taccurant, tenfel s tudert, teldi cwit am twerdet yettrajun tafsut…

Haldvan d Anna zewjen. Haldvan yegga axeddim-ines iwakken ad yidir yal dqiqa tudert n tayri d Anna ig hemmel ugar n yal taghawsa. Di tazwara, tthewisen, zzuren-d akk imedqan ineflen d cbaha yecban Paris, Rome, Venise, Verone…

Zrin iseggasen, yebda lehzen yeghli-d ghef Anna. Tebgha ad teseu igerdan maca zher-is ur d yefk- ara. Anna tughal tbeddel. Tugi ad teffegh deg uxxam. Argaz-is ihar d acu ara yexdem. Anna tezga testeqsay ghef sebba itt yeggan ur tesei-ara igerdan imi amejjay yenna-as ulac uguren ig zemren ad gedlen tarawt.

Zrin iseggasen di tusaft d lehzen. Yiwen wass, Anna tesla i wegrud yesqerbub-d deg ueebbud-is. Tumert tughal-d gher uqadum-is. Thegga-d akk iselsa icebhen ara yels wegrud-is. Tughal tefreh, tettadsa, tesaram, tettargu, tetthewis…

Asmi i thulfa qrib ad arew, truh gher sbitar. Agrud-ines yesea uguren n tdawsa. Nettat teslek di lmut ma d agrud-is yemmut. Deg ass-nni, Anna tekcem deg yiwen yifri d aberkan, ur yesei asirem, ur yesei tagara. Xas akka argaz-is yezga gher yidis-is deg yid, deg uzal maca tugi ad tebru i lehzen, tezga tettru, teqqar, tettales awal am tmexlult: “Lukan yedder xersum kra n dqayeq, ad ttfegh gar yighalen-iw, ad thuzegh deg yirebbi-w, ad waligh amek ittecmumuh…”

Zrin kra n wagguren, temmut Anna. Yegra-d wehd-s Haldvan yettghid,yezga yezzughur idaren-is war asirem negh iswi. Yettidir di tusaft, ttlam yezga d amwanes-is. Ula d ccrab yugi as id yawi talwit negh tatut. Tagara, yengha iman-is, yegga-d tabrat i gma-s:

-“Surfiyi a gma aezizen, ur zmiregh ad idiregh war Anna, d awezghi!”

 

Une nouvelle de Par Lagerkvist, adaptée par Hammar Boussad.

Laisser un commentaire