Dda Saɛid : Ameɛdur d win yettagaden



Dda Saɛid ḤAMUM, ilul deg useggas n 1956 di taddart n At wizgan. Asmi yesɛa sin n yiseggasen di leɛmer-ines, yeɣli ɣer lkanun, times tečča allen-is, tes-sedrɣel-it. Xas ma tadyant i as-yeḍran qerriḥet, Dda Saɛid ur yebri ara i ṭṭbel deg waman, ur yerr ara iman-is deg-idis di  tmetti ideg yettidir.

Yekker- d  am yilmeẓyen n taddart-is, ileḥḥu, yetturar, yettḥewwis, am tizya-s, am winna akken yettwalin. Aṭas n imahilen yexdem iwaken ad yessasi aɣrum-is. Dda saɛid yezweǧ, yesɛa kraḍ warrac akked  teqcict.

Di tazwara, yesbedd tadabut di tiɣiwant n Buzgan, anda yella yeznuzuy duxxan, cemma, kaw-kaw… yuɣal yessuli taḥanut di taddart-is anda yella yeznuzuy isufar n wučči, alarmi d asmi d-yufa axeddim deg yiwet n tkebbanit yessexdamen imdanen ixussen deg usekkud. Dinna, Dda Saɛid yelmed amek ara yexdem imedwasen, dinna daɣen i yegza amennuɣ ɣef yizerfan n yimeɛdar.

Xas akken ur yeɣri ara deg  uɣerbaz, maca tessɣer-it ddunit, yelmed si tilufa i as-yezzin, tid-nni yurzen tudert-is, yettmeyyiz, yettxemmim am yimusnawen imeqranen yecban amaru mechuren aṭas <<Paolo COEHLO>>, id yennan deg wawal-is: <<la seule chose qui puisse empêcher  un rêve d’aboutir,  c’est la peur d’échouer >>. Yezri wakud, Dda Saɛid, simmal yettaẓ ɣer sdat, xas ma uguren zzin-as, maca yessbur tabɣest n yizem, yezga laman s idisan-is. Asmi iwala lbaṭel iɛedda tilas ɣef yimeɛdar, yesslul-d tiddukla n yimeɛdar, yefka-as isem n <<Tiddukla n yimeɛdar n Buzgan akked imeddukal-is>>, iswi n tiddukla-a d amennuɣ n yal ass ɣef izerfan n imeɛdar sumata. Di tazwara, tiddukla-agi tettɛawan imeɛdar s kra n tɣawsiwin, am tiɛewzin, tifersuda, isufar n wučči..

Ass-a,tiddukliwin  nniḍen ttmettatent, kra dayen mmutent, ma d tiddukla n Dda Saɛid mazal-itt tedder, tessewhem imdanen. Xas ma ḥercaw-it wussan maca tiddukla tedder d wussan, tessawed ass-a, teldi aɣerbaz anda ara sselmaden    imeɛdar. Aya akk dayen yeǧǧan aselway-is ad yuɣal d amedya di tmurt n Leqbayel.

Sghur Hemmar Bussaed

Laisser un commentaire