Tadiwennit s usugen akked Muhend Akli Salhi.



A: Anwa id Mass.Muhend Akli Salhi?

T: Nekk d aselmad n tsekla deg ugezdu n tutlayt d yidles n tmazight di tesdawit n Tizi-Wezzu, d anagmay, d amaru.

A: D acu i turid?

T: Urigh “Asegzawal amezzyan n tsekla” d sin yidlisen nniden. Asegzawal-agi yeffghed di tezrigin “L’odyssée’ deg useggas n 2012.Yesea 131 isebtaren.

A: Anti tiwsitin i yettikkin di tsekla?

T: Anezgum, tamedyazt, ungalen, idrisen, timucuha, tineqqisin, tiqesidin.

A: D acu i d ungal?

T: Ungal yemgarad ghef tullist. D aghezfan, yesea atas isebtaren d iwudam. Amaru yesea adeg, akkud, tilelli akken ad yinni akk tiktiwin-ines d wafrayen-is s tehri.Yessexdam atas n tghawsiwin akken ad icebbeh tira-ines. Yessexdam algam, tifutas, aghanib usrid, tugniwin, takerrist, taseqlebt, tumnayit … Yettcuddu tilawt d usugen s tiherci. Ur tezrid anda tebda tin, anda tfuk tayed.

A: I tullist?

T: Dagi ilaq amaru ad yinni atas s cwit n wawalen, d iwudam d isebtaren. Tulist d tawezlant. Deg yiwen wammud n tullisin, ad affed azal n mraw tulisin. Isental d iwudam mgaraden di tullist gher tayed macci am wungal.

A: I tmedyazt?

T: Amedyaz ixeddem isefra. Yal asefru yebda d tiseddarin. Yal taseddart tesea tameghrut i yettmuddun azawan i usefru. Maca, asefru ilelli ur yettqadar ara tameghrut negh ilugan n tira. Yesea ugar n tlelli. D agi amedyaz yettak azal i tikti macci i cbaha n wawal.

A: I tmacahut?

T: Ulac tilawt di tmacahut. Iwudam d iwaghezniwen, d ighersiwen…Zik n zik, timucuha llant kan di timawit. D timgharin itent ihekkun gher yiri n lkanun i warrac imectah akken ad gnen negh ad lemmden asugen d umawal.

Ass-a, imyura ttarun timucuha akken ad qqimen-t i lebda xas mmuten igad i tent-id yesnulfan.Tamacahut tesea tagnit n tazwara akked d tagnit n tagara.

A: Acugher i turid asegzawal-agi?

T: Xedmegh-t-id i yinelmaden d yiselmaden akken ad tifsus taekemt fell asen ticki ara xedmen tazrawt i udris aseklan.

A: Tanemmirt s tusda a Mass.Salhi imi tqedced atas ghef yidles amazigh.

T: Ar tufat!

Sghur Hemmar Bussaed.

Laisser un commentaire