Tafsut n Imazighen, amennugh ilaq ad ikemmel.



Ass-a 20 di yebrir, d ass aezizen ghef Imazighen, d ass ikecmen deg umezruy. Yal aseggas, Imazighen anda ma llan xedmen-as asfugel. Ttagnit akken ad smektin amennugh iwakken tasuta tamaynut ad t-issin amezruy n tmurt-is.

Amennugh ghef tmazight yebda zik n zik asmi llan igelliden mass nsen d Yugurten d wiyad nniden maca nekk ad bdugh deg useggas n 1949.

Di tallit-nni,tuget n yiqbayliyen ttikkin gher ukabbar n wegdud azzayri (P.P.A). Tuget n Yiqbayliyen nwan iman-nsen d Aeraben, takemict kan n tzizwa i yezran belli Iqbayliyen d Imazighen am nutni am imezdagh n Tefriqt Ugafa. Gar yizmawen i yebdan amennugh d imezwura ghef timagit d yidles Amazigh, ad bedregh kra imedyaten: Bennay Waeli, Laymec Aeli, Imac Aemer, Racid Aeli Yehya,BeseudMuhend Aerab Amar Ould-Hamouda…Amennugh ur yewwi-d ara gher yiswi imi drus yidsen. Wa nghant, wa sducent gher yinig…

D saeid Bulifa i d amezwaru i yebdan almud n Tmazight. Yughal yesselmad-itt deg ugherbaz n Buzariea. Yura dighen kra n yidlisen s tmazight maca drus i yeslan s leqdic-ines.

Di 1962, Dda.Lmulud Mammeri yeghra Tamazight di Rabat, Paris d Lezzayer tamanaght. Asmi id yewwi igerdasen, yebda yesselmad tamazight di tesdawit n tmanaght armi d 1973. Di tazwara, unfen-as ad iselmed. Asmi walan bdan ttruhun-d atas n yinelmaden, hebsen timsirin n Dda.Lmulud. Ughalen yimdanen lemmden Tamazight s tufra. Lemmden isekkilen n ugemmay, ilugan n tira, tajerrumt, amawal…di cwit n yidlisen d tisghunin i yellan.

Inelmaden n Dda.Lmulud bdan qedcen ula d nutni deg unnar s tufra, yal yiwen yefka-d afus di taghult-ines: wa di tzuri, wa di tsekla, wa di tusna, wa deg umezgun, wa di ccna, wa deg uselmed, wa di tira, wa deg uzawan…Tagara ssudsen-d amusu adelsan Amazigh(M.C.B) ma d Dda.Lmulud yelha di tira. Yura “Tajerrumt n Tmazight” yerna “ Isefra iqburen n tmurt Leqbayel”.

Yewwed-d useggas 1980, inelmaden n tesdawit n Tizi-Wezzu necden-d Dda.Lmulud akken ad yawi awal ghef udlis-ines amaynut. Imsulta nnan ala i usarag n umusnaw. Imdanen rfan, ur qbilen ara lbatel n udabu Azzayri.

Amussu adelsan Amazigh(M.C.B) igred tighri i wegdud Aqbayli. Agdud yerra-d i tighri. Imezdagh n tuddar subben-d akken ma llan gher Tizi-Wezzu. Amennugh yendeh. Imdanen s yidghaghen ttsughun : « Pouvoir assassin! », «  Abat la répression! Liberté d’expression! », « Ass-a ! azekka ! Tamazight tella ! tella ! ».Imsulta s yimrigen nghan, jerhen, hebsen 24 imasayen n M.C.B.

Di 1949 armi 1980, amenugh yexdem asurif d ameqran gher sdat. Yezri wakud, Tamazight tughal d tutlayt taghelnawt, tunsibt. Maca,d awal kan yuran ghef tmendawt. Adabu ur yefki-ara izerfan i Tmazight am Taerabt negh tutlayin nniden.  Imdanen ughalen gher deffir deg umennugh,ttsen, bran i ttbel deg waman. Ilaq ad ikemmel umennugh.

Sghur Hemmar Bussaed.

Laisser un commentaire