Tajmilt i Taher Djaout (2): Anebdu aneggaru n tudert.



Boualem Yekker yegza ifuk sswab, tfuk tudert, d anebdu aneggaru id yeqqimen send ad izekker umezruy tiwwura. Akud yughal war tisemhuyin, war cbaha, war lbenna. D aberkan kan, ur ibban ansa i yebda negh ansa ifuk. Igenni yendem di tafat id yettak zik. Itij yugi ad yeslef i kra nni n yimdanen i mazal ur rwilen ara. Mazal saramen ad yezzi akken ad yeslef i tfekiwin nsen s yizenzaren n tafukt. Yughal s tufra kan id itteffegh ssbeh, itteffar s lemghawla tameddit amzun akken yugad ula d netta.

Anebdu-agi, ggten irebraben. Yal tanzayt ad sfeqden gher teftisin akken ad debbren ghef yimdanen amek ara ccfen, amek ara rsen iselsa. S iqendyar, isandalen, iccumar ighezfanen d irabuzen, sseghlin-d rrebrab ghef  yimdanen di teftisin. Tilawin, hetmen fell asent lhijab aberkan ma d irgazen ad ccfen kan anda ulac tilawin yerna s iserwula. Tayri, tadsa, tumert, talwit, asirem, tirga ggujlen. Imdanen rreglen yiwen yiwen ghef teftisin armi id yegra yillel wehd-s, yenfel d tusaft d lehzen.

Boualem Yekker yugi ad yebru i lwaw am wiyad. Yezra imcumen-agi bghan ad ssudsen tudert akken isen yehwa. Bghan ad seghlin tugdi ghef yimdanen akken ad awden gher yiswi nsen. Yesaram imdanen ad seun tabghest akken ur ttaggan-ara at iccumar ad xedmen awanek ineslem di tmurt n Lezzayer.

Akken yugh tanummi deg yisegasen yezrin, Boualem Yekker yeddem takerrust-is, yerna tawacult-is, yettef abrid gher yillel. Ruhen gher yiwet n teftist tecbeh ugar n targit deg yiwen umkan anda mlalen wedrar akked lebher. Amkan-agi yebeed ghef tmanaght, mazal deg-s talwit, mazal ur ttfaqen ara irebraben.

Sbedden aqidun nsen ghef yiri n teftist. Hemmlen ad slen i zhir n lemwaji ticki i tturaren-t. Boualem d twacult-is seeddan 3 smanat n yimuras acekitent. Kksen lxiq akken iwata xas akka llan kra n wuguren iwakken ad aghen kra n tghawsiwin, amedya aghrum. Boualem yecfa ghef ass aneggaru n imuras nsen id yeghlin ass amenzu n Ctember. Imi d kkren ssbeh, uffan-d igenni d yillel rfan atas, heznen d ayen kan. Abehri yezughur isigna. Isigna xedmen-d tili anect ilat di teftist. Itij ur yezmir ad yesken iman-is.

Boualem d mmi-s ruhen gher yigran id yezzin ghef teftist akken ad asen inni-n qqimet di lehna, ar tufat, tanemmirt ghef cbaha-nwen igh iwansen achal aya!

Boualem d mmi-s Kamal lehhun deg ugama, wehmen di cbaha n yisekla, n yimghan, n yighersiwen…Xas akka tekkat lehwa, ur nherwan ara. Tagara, ughalen gher teftist, rrnan ccuren allaghen nsen s tugniwin n ccbaha send ad ughalen s axxam.

Ggren tighawsiwin id wwin yidsen gher tkerrust, ttfen abrid n tughalin. Imi d mazal azal n 50 ikilumitren ad awden gher tmanaght, uffan-d kra n yilmezyen s iccumar rsan iselsa am idak nni i ttrusen di tmurt n Afghanisan. Deg yifasen nsen ttfen ibeckiden, ijenwiyen, irabuzen…gezmen abrid s yidghaghen. Ssehbasen-d tikerrusin, ttmuqulen tilawin ma yella rsan-t lhijab negh ala.

Boualem Yekker yecca times, yekuffer di lbatell i xeddmen maca ur yezmir d acu ara yexdem. Yeshasef ghef nnif i yeffeghen imdanen.                                         

 

Extrait du roman de Tahar Djaout (1954-1993),                                                                                 

«  Le dernier été de la raison », adapté par Hammar Boussad.

Laisser un commentaire