Tajmilt i Taher Djaout (4): Irebraben zekkren tiwwura n usirem.



Boualem Yekker yeddem-d adlis n tfelsafit i teqqar yelli-s Kenza di tesdawit. Yeghra-d cwit, yewhem d acu i sselmaden i yelli-s di tesdawit n irebraben:   “Karl Marx d akafriw, ur yumin ara s Rebbi d Nnbi. Yuklal lmut am netta am ccwaten it yettaffaren.”

Yesres Boualem adlis s wurfan yenna: “Tafelsafit i yellan d tusna icebbhen yebnan ghef ccek, tuttriwin, isteqsiyen…tughal beddlen-as iswi irebraben n tmusni. Ekkessen-as adif, cbaha, asugen…Ggan-d ala ighsan, idghaghen.”

Ula d yelli-s Kenza tdegger iselsa uzyinen n tgadit, telsa talaba taberkant, tughal tecba agerfiw negh akemic ameqran n tili. Allagh-is d wul-is ughalen am udghagh. Tughal ur tettxemmim, ur tetthulfu, ur tettadsa, ur tettnecrah…Tbeddel cbaha-ines n tefsut s tebrek n tegrest.

Send ad truh i lebda, tenna-as i baba-s war lehya, tugdi negh akukru:

-“Sethagh deg ubabat am keccini i yugin abrid n Rebbi d Nnbi. Ad akk tecc tmes n gahenama.”

Ccix yebda yettsughu s wayen yesea d ssut. Ssut-is yezger akkin i tghaltin s tawil n isawaden ijehdanen, slan-as-id ula d ighersiwen. Ddin ddin, 3 tzarbiyin ghlint-d deg yigenni. Tamettut-s, mmis d yelli-s bdan tazalit. Imi fuken, send ad ruhen war tughalin, tesegraya-s-id yelli-s Kenza id irebba s tnefcic awalen d iqerhanen.

Boualem Yekker yesusem, yebehba, ur yezri d acu ara d yinni. Yegza ddin-agi amaynut yerra yelli-s am udghagh. Yukker-as temzi-s, lehnana-s, cbaha-s,   talsa-s, allagh-is…Taqcict-nni tamectuht ig hemmlen baba-s temmut.

Iwakken ad yagh cwit n talwit, Boualem Yekker yesenda allagh-is i talit-nni n zik n zik, send ad nulfun iwaghezniwen akken ad yaggem aktayen yelhan, ad yezuzen yissen tudert-is.Yemektad Kenza asmi tetturar d iferrawen n yisekla id yeghlin deg umwan gher lqaea. Kenza tetturar, tettazal, tettadsa, acekuh-is aghezfan yettawi-t ubehri. Ifrax tturaren yid-s, ticki qrib ad t-awed ghursen, ad beddlen amkan.

Yiwen wass, Kenza teghli ghef udghagh, tejreh, idamen ttazalen. Boualem Yekker yeffegh-it leeqel, yejreh wul-is, yugad ad t-mmet. Yewwitt s lemghawla gher sbitar s tkerrust-is tamectuht. Kenza tettsughu, netta yettru, ynna deg wul-is:

-“ Lukan ad t-mmet, wareg ad qeblegh ad seugh agrud nniden. Ur zrigh ara amek ara idiregh war Kenza…”

Extrait du roman “Le dernier été de la raison,”du grand écrivain Kabyle Tahar Djaout (1954-1993), adapté par Hammar Boussad.

Laisser un commentaire