Tastaɣt, tudert ur tḥebbes ara



Aṭas n yimdanen ttagaden ad fɣen tastaɣt. ɣur-sen amzun xedmen asurif ɣer temɣer, ɣer lmut.

Ugaden ad uɣalen ur nfiɛen ara, ur sɛin ara iswiyen, ur sɛin ara adabu.

Ugaden ad qqimen war ccɣel, war assirem, ad ttezzin deg uxxam neɣ deg yiberdan am iṭarusen, Maca,anect-a-agi deg wallaɣ-nsen kan i yella mačči deg tilawt. Tudert ur tḥebbes ara mi ara yeffeɣ umdan tastaɣt.yezmer ad yexdem tiɣawsiwin ur yuɣ ara tannumi ixeddem-itent.

Yezmer ad yettiki deg tdukli ixedmen tasertit. Ma ur iḥemmel ara tasertit, ad yettiki deg tdukliwin i iqeddcen ɣef yidles amaziɣ neɣ tidak i iqedcen ɣef twenaḍt d ugama. Yezmer ad yexdem addal neɣ ad iɛiwen tidukliwin i iqeddcen ɣef yimaɛḍar neɣ imuḍan.

Yezmer ad yaru neɣ ad iɣer idlisen. Yezmer ad yenɣec tineqlin neɣ tizemrin, yezmer ad yefres igran-is. Yezmer ad d-yaɣ taɣaṭ neɣ ulli. Ad tent-ikes. Yezmer ad iḥewwes, ad d-iẓur idurar, tuddar, timdinin…ur yessin ara.

Tamurt nneɣ teččur d imeḍqan i ineflen deg ccbaḥa.

Lliɣ selmadeɣ deg uɣerbaz alemmas, kerheɣ iman-iw, yal ass tweswiseɣ am win itteddun ar waɣzen at yečč. Asmi bdeɣ 50, f ɣeɣ tastaɣt, uɣaleɣ d amerkanti axaṭer ttaɣeɣ ugar n sin n yimelyaren n lehna imi ul-iw d wallaɣ-iw thenan, uɣaleɣ gganeɣ deg yid, ṭaxreɣ i dolipran.

Tura, sɛiɣ akud  iwakken ad xedmeɣ ayen bɣiɣ. Ḥemmleɣ ad aruɣ imagraden iwakken ad fkeɣ ula d nekk afud i tutlayt d yidles amaziɣ. Di tagara, ssarameɣ afud igerzen i yixeddamen izzayriyen ig fɣen tastaɣt..

Sghur Hemmar Bussaed

Laisser un commentaire