Taxbizt



Mḥend d yiwen uzzayri ikerhen iman-is. Netta akked lmeḥna  d tizyiwin, akken id lulen, ur yessin ad iɣer neɣ ad yaru.

Asmi yekcem ɣer uɣerbaz yezga weswir-ines ulac, yettɛawad kan i iseggasen, ɛyan deg-s ula d iselmaden-ines dɣa ḍeggrent ɣer uzniq, yerwa amender deg yiberdan. Asmi yeɛya deg umender  deg yiberdan n taddart, iqelleb ɣef uxeddim. Maca, ala lexdayem yenɛettaben i t-id isaḥḥen. Yendem alarmi dayen kan imi ur as-yefki ara azal i leqraya. Maca, ndama tettas-d taneggarut. Mḥend yettidir tudert n weydi. Ixeddem aṭas, yettaɣ ciṭuḥ n yidrimen. Yesɛa 40 n yiseggasen, ad t-waliḍ ad as-tiniḍ 80 n yiseggasen i yesɛa. anyir-is yeččur d tiregwa ad as-tiniḍ d amekraz itent-ikerzen. Allen-is nexrent ɣer sdaxel, lqedd-is yekna, arqiq am umesmar, iɣsan-is ttbanen-d ɣef uglim-ines. Asmi yewweḍ tizi n zwaǧ, yettqellib tinna d wara yezdi lmeḥna-s. anda yewweḍ, as id mmuden 3 yisteqsiyen :

-Teɣriḍ ?

-Ala.

– Txeddmeḍ ?

-Ih.

-Tettaɣeḍ aṭas ?

-Ala.

-Ur teɣiriḍ, ur tettaɣeḍ aṭas, yerna t-ḍemɛeḍ ad taɣeḍ yelli. Tenwiḍ ad tidir s tayri d waman isemmaḍen, ruḥ ad tt-leɛbeḍ ɣef yiman-ik.

Alarmi yerwa tid-ak yuran i yufa tameṭṭut icuban ɣur-s. ur teɣri, ur tezyin, ad as-tiniḍ teffeɣ-d srid si ǧahennama. Yesɛa-d ṭeẓẓina n yigerdan yid-s.

Mi ifukk lxedma-s, yekreh ad yekcem s axxam acku yal yiwen yettsuɣu :

-Aɣ-iyi-d aqrab !

-Awi-yi-d ayefki !

-Awi-yi-d zzit !

-Xelles aman akked trisiti !

Mḥend yezga yettazal deffir texbizt, anda tella ad tt-yeḍfer, nettat treggel fell-as. Yerwa lemrar fell-as, yectaq ad yerwu iḍes.

Yal ass, yettnekkar send ad yecreq yiṭij, fell-as yedda ḥafi, yeqbel ddel. Yezga yettsuɣu fell-as umɛellem-ines, netta yessussum kan akken ad tt-dum fell-as texbizt-is, acku axeddim ixus, fell-as ur yeǧǧi amkan, yexdem di seḥra i yiṭij yesserɣayen, yexdem deg udrar i wugris igezzmen imeẓẓuɣen.

Fell-as yexdem acḥal n tɣawsiwin. Yexdem d imaswaten, yessareǧ isebbaḍen, iferreɣ acḥal n tzebbalin, yenɣec acḥal d isekla, iɛebba ayen ẓẓayen, asɣar, lyajur, ssiman…

Tagara, teǧǧat tezmert, laɛqel-is yexṣer, yuɣal i teddu dg webrid yeshetrif, yettcuddu taxbizt s lxiḍ ɣer wammas-is, yezzuɣur-itt, yekkat-itt yeqqar-as :

-Acḥal-aya ṭafareɣ-kem, kemm treggleḍ fell-i, tura tezzi-d nnuba-m, d kemm-i ara iyi-d-iḍefren.dɣa ad yernu as yefk tiɣrit .

 

Sghur Hemmar Bussaed

Laisser un commentaire