Tudert n zik sɣur Nna Zahra __ Sghur Hemmar Bussaed



Nna Zehra, d tamɣart n lbaraka, tesɛa  ugar n 80 iseggasen deg tudert-is; steqsaɣ-tt ɣef tudert n zik, hat-aya srid dacu i yi-d-tenna:

‘‘zik, irgazen tetten seksu d  timẓin akked d tberbuct.

Tilawin ur tetten-t ara alama fuken yirgazen.tettent aksum ass n ttlata (suq) kan d wass n lɛid; ma d irgazen tetten aksum ticki yella.

Xas llan wuguren agi, zik i bninet tuddert. Zik, tella niya, tella lehna, lxir.

iɣermanen ttemɛawanen, ayen sɛan at ferqen.

Imḍanen akk xuṣen.Ulac win ara yeḍsen ɣef  wayeḍ. Win yeluẓen, ad iruḥ ar lǧiran ad yeseḥmu.

Weqbel ad yecreq yitij, tilawin ad ruḥen-t ar teẓgi, ad zedment isɣaren, d nutenti ig ttḥucun tuga, ig megren irden, d wayen zerɛen.

Zik, imdanen tetten abeluḍ, irden; timzin, tazart, lxedra, igumma, aɣrum d zit, tameqfult n tarast, tifaf, tixlal n temcict, aɣeddu bwakli, axerub, tuɣmas temɣarin, tazedla, tireɣla, tizwal, mejjir, iɣsas …  ɣef aya ur yeqwa-ra waṭṭan uxenziz am tura.

Zik, ulac trisiti, ttecɛalen lamba lgaz neɣ tacemaɛt. Seḥmayen s yeɣaran. Tawacult akk a ttezi ɣef lkanun. Tamɣart ad ḥku timucuha, amɣar ad yeḥku tidyanin yezrin neɣ tid n yal ass.

Zik,ticki yella wugur amectuḥ, at frun yemɣaren n taddart, ma yella dugur ameqran, at frun yimɣaren n lɛerc, ur ttruḥun-ara saxxam n creɛ.

Zik, tella niya, ttqadaren medden cada Rebbi. Ticki nejmaɛen, aqeru n taddart neɣ lɛerc ad yini: ‘ɣurwat cada Rebbi, Win yezran kra lbaṭel a-t-id yini” Iɣermanen ur susumen-ara am ass-a  ɣef texnanasin neɣ tixurdas i xedmen yir yimdanen.

Win yecḍen ad ixeleṣ lexṭiya u yerna at bhedlen akken iwata.

Zik,nettagad cetwa d yideflawen i iɣelqen iberdan. Ticki ifuk unebdu, ad najew irden akked d temẓin, an ččar ikufan.

Nettheyyi-d diɣen isɣaren. Ma d zit nettaǧǧat deg yicbula. Zik, d tilawin i yeẓẓaden azemmur di lemɛinṣra n leqbayel. Ticki yella userdun neɣ aɣyul, d nutni i iẓuɣuren aɣaraf, ticki ulac iɣersiwen, d tilawin i t yeẓẓuɣuren.

Sghur Hemmar Bussaed.

Laisser un commentaire